ШҚО әкімдігінде әр аудан мен саланың экономикалық өсу мүмкіндіктері қарастырылды. Жиынға басқарма басшылары, аудан және қала әкімдері қатысып, өңірдің даму әлеуеті жан-жақты талқыланды,- деп хабарлайды Altainews.kz тілшісі.

Шығыс Қазақстанның мемлекеттік менеджерлері өз жоспарлары мен ұстанымдарын таныстырды. Облыстың әр ауданында, әр саласында экономикалық дамуға үлкен мүмкіндіктер бар. Бұл – консерві өнімдерін өндіру, жергілікті өнімдерді көтерме және бөлшек саудаға шығару, ауыл шаруашылығында кооперацияны дамыту, сондай-ақ ауыл шаруашылығы өнімдерін өңдеу арқылы шағын кәсіпкерлікті дамыту сынды бағыттар.

Аймақ басшысы Ермек Көшербаев қатысушыларға нақты жобаларды дамытуға қажетті жағдайлар жасауды тапсырды. Бұл жобалар бюджет кірісін арттырумен қатар, тұрақты жұмыс орындарын құруға ықпал етуге тиіс. Әкім барлық жаңа бастамалардың жобалық кеңсе қағидаты бойынша іске асырылуының маңыздылығын атап өтті. Бұл тәсілде салалық басқармалар мен жергілікті билік органдары, сондай-ақ бизнес пен қоғам өкілдері тығыз ынтымақтастықта жұмыс істейді.

Туризм саласына ерекше назар аударылды. Табиғаты әсем, бірегей ландшафттарға бай Шығыс Қазақстан өңірі туризмді дамыту үшін үлкен мүмкіндіктерге ие. Бұл салада да, ауыл шаруашылығы өнімдерін өңдеу сияқты бағыттарда да аудандар арасындағы кооперацияның маңызы зор. Өңір біртұтас жүйе ретінде жұмыс істегенде ғана экономика өсіп, халықтың әл-ауқаты арта түседі. Өнеркәсіп өнімдерін терең өңдеуге, жаңа кен орындарын игеруге және геологиялық барлау жұмыстарына да үлкен мән берілуде.

Айта кету керек, 2023 жылдың жазынан бастап өңірдегі әр аудан мен саланың өндіріс пен тұтыну, сұраныс пен ұсыныс теңгерімі егжей-тегжейлі есептеліп келеді. Жобалық кеңсе қағидаты өңірлік және мемлекеттік деңгейдегі бағдарламаларды жүзеге асырудың негізгі құралына айналды. Әрбір қала, аудан және басқарма осы жүйе аясында тығыз ынтымақтастық орнатып, нақты нәтижелерге қол жеткізуді көздеп отыр.