Былтыр Шығыс Қазақстанда мемлекеттік меншікке 125,7 мың гектар пайдаланылмайтын ауыл шаруашылығы мақсатындағы жерлер қайтарылды, деп хабарлайды Altainews.kz тілшісі.

Бұл туралы өңірлік коммуникациялар қызметінде өткен брифинг барысында облыстық жер қатынастары басқармасы басшысының орынбасары Дәулет Сарманов мәлім етті.

Ол, сонымен қатар 2024 жылдың басынан бері облыста 17,5 мың гектар жер мемлекетке қайтарылғанын хабарлады. 

Айта кетейік, 2019 жылдан бері облыста ауыл шаруашылығы мақсатындағы жерлердің ғарыштық мониторингі жүргізіліп келеді. Ғарыштық мониторинг жерді пайдалануды талдаудың тиімділігін арттыру мақсатында қашықтықтан зондтау деректерін және мемлекеттік дерекқорлармен интеграцияланған геоақпараттық технологияларды пайдалану негізінде жүзеге асырылады.

Ғарыштық мониторингтің деректеріне сәйкес, 2022 жылы облыс бойынша Ғарыш Сапары веб-порталында 625 мың гектар пайдаланылмайтын жер тіркелген.