Жуықта еліміздің денсаулық сақтау министрі Ажар Ғиният АИТВ инфекциясы көп тараған облыстардың қатарында ШҚО-ны да атады.

Облыстық ЖИТС-тың алдын алу және оған қарсы күрес орталығының эпидемиолог-дәрігері Татьяна Башкирцеваның айтуынша, облыста жұқпалы дертке қатысты эпидемиологиялық ахуал әлі де шиеленісті болып тұр.

АИТВ инфекциясының таралуы бойынша ШҚО республикада екінші орында. Аурушаңдықтың интенсивті көрсеткіші 100 мың тұрғынға шаққанда  –  29,4, өткен жылы – 31,2 болды, жеті айдың ішінде аурушаңдықтың бес пайызға төмендегенін көреміз. Дегенмен жыл сайын инфекцияны жұқтырғандар санының артқаны байқалады. 2023 жылғы 30 маусымдағы мәліметке сәйкес, облыста АИТВ инфекциясы бар 5102 адам тіркелген.

Маманның айтуынша, облыста жұқпалы инфекция тіркелмеген өңір жоқ. Тарбағатай, Күршім, Зайсан сияқты шалғай аудандарда бірлі-жарым кездессе, өнеркәсібі дамыған өңірлерде жаман дерт өршіп тұр. Аудандар арасында Риддер (53,7) көш басында, Шемонаиха – 49,9, Алтай ауданы – 48,8, Глубокое ауданы – 40,4. АИТВ инфекциясын жұқтырғандардың 78,8 пайызы – 20-49 жас аралығында, нағыз белсенді өмір сүретін, жұмыс істейтін жастағы адамдар.

Татьяна Михайловна түсіндіргендей, облыста жүкті әйелдерді АИТВ инфекциясына тексеру қатаң бақылауға алынған, олардың кем дегенде 98 пайызы мониторингпен қамтылады. Егер АИТВ инфекциясын жұқтырған жүкті әйел орталықта диспансерлік есепте тұрса, тағайындалған ем-домын жібермей, бекітілген кестемен ішіп жүрсе, дерт шаранаға жұқпайды. Босанған кезде шарана кесер тілігімен алынады. Сондай-ақ сәбиді анасының сүтімен емізуге болмайды.

Бүгінгі таңда вирусты толық жою, дерттен құлантаза айығу мүмкін емес. Алайда науқас емін үзбей, препараттарды үнемі қабылдап жүрсе, қандағы вирустық жүктеме анықталмайтындай деңгейге түседі, осы көрсеткіш 95 пайыздан кем болмауы керек, өңірдегі көрсеткіш – 87 пайыз. Егер емделіп жүргендер дәрігердің барлық шараларын орындап жүрсе, олардың өмір сүру сапасы жақсарып, Алла берген жасын сүруге мүмкіндіктері бар.

Айна ЕСКЕНҚЫЗЫ