9 шілде күні сағат 15.00-де Күршім ауданындағы таулы жерде найзағайдың әсерінен құрғақ шөп жанып кетті.

Оқиға орнына автокөлік техникасымен жету мүмкін болмағандықтан, жергілікті атқарушы органдардан, өрт сөндірушілер мен орманшылардан 34 адам жану ошағына жаяу жіберілді, деп хабарлайды Altaynews тілшісі.

Құтқарушылардың дереу іс-қимылдары арқасында 10 шілде күні сағат 00.00-шамасында 3 гектар алаңдағы өрт ауыздықталды.

Естеріңізге сала кетейік, облыстың оңтүстігі мен батысында әлі де өрт қаупі жоғары. Сондықтан ШҚО ТЖД халыққа ашық отты пайдалану кезінде өте сақ болуға, үйлер мен үй-жайлардың жанында от жақпауға, құрғақ шөпті, қамысты өртемеуге кеңес береді.