ШҚО бойынша Тауарлар мен көрсетілетін қызметтердің сапасы мен қауіпсіздігін бақылау департаменті берген мәліметтерге сүйенсек, бүгін, яғни 2020 жылдың 11 мамыр күні облыста 51 коронавирус инфекциясын жұқтыру жағдайы тіркелген, оның 30-ы соңғы 10 күннің ішінде анықталған, деп хабарлайды Алтайньюс тілшісі.

   Семейде ауру тіпті өршіп бара жатыр. Қалада 41 жағдай тіркеліп, қауіпті инфекцияның 50 ошағы анықталып отыр, оның ішіндегі 7 жерде  жаппай ауру белгілері  байқалып, 35 адам тізімге алынды.   

Нақтылап айтар болсақ – бір отбасында 11 адам, оларға көрші 2 адам және жұмыстағы 3 бірдей әріптесі тіркелді. Ауырғандардың арасында Нұр-Сұлтаннан келген қонақ та бар.

Семейде тағы бір жиында, яғни туған күн тойлатуға барған 9 қонақ  коронавирус жұқтырған.

- 14 жасқа дейінгі балаларға жұғу жағдайы -10,  40-49 жас аралығындағы тұрғындар арасында 10 жағдай тіркелді. Вирус жұқтырғандардың 26,8 пайызы пневмония және тұмаудың әдеттегі түрімен ауырғандар,-дейді департамент мамандары.

Семейдегі аурудың өршіп кетуінің ең басты себептерінің бірі де бірегейі осы  – карантин ережелерін сақтамаудан болып отыр.

- Туған күн тойлатамыз  деп қауіпті вирус жұқтыруларына байланысты  1287 семейлікті оқшаулауға тура келді. Сонымен қатар астанадан келіп блок-бекеттерден өтіп кету жағдайлары да анықталып отыр. Облыстағы 99 вирус ошағының 54-і Семейге тиесілі,-деп жазылған ведомства таратқан мәліметте.

Осыған байланысты індетке қарсы және оның алдын алу іс-шаралары әлі де жалғаса түседі.