Өскеменде жұмысшылар Максим Горький көшесінің асфальтты қопарып тастады. Көлік қозғалысы қиындады, деп хабарлайды Алтайньюс тілшісі.

Қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің коммуналдық қызметкерлері Горький көшесінің асфальттын қайта аршып жатыр. Себебі жаңбыр толассыз жауған күндері Горький және Бейбітшілік көшелерінің қиылысында кеме жүзетін көлшік пайда болады. ТҮКШ бөлімі бұл мәселені осылай шешпек.

– Иә, бұған дейін ол жерде үнемі жаңбыр суы тоқтап қалатын. Бұл қала тұрғындарына айтарлықтай қиындық туғызып келді. Қазіргі уақытта жұмысшылар көше қиылысына құбыр салып жатыр. Содан кейін оны тоқтау суға «қосады», – деді ТҮКШ бөлімінің баспасөз хатшысы Владимир Землянский.

Мамандар көлік қозғалысы көп ұзамай реттелетінін айтты. Жұмысшылар асфальт қабатын қалпына келтіруге таяды.