Жерлесіміз Ресейдің Санкт-Петербор қаласында өткен жекпе-жек түрлерінен Әлем чемпионатында тамаша өнер көрсетіп, доданың күміс жүлдесіне ие болды.

Облыстық қоян-қолтық және таэквондо федерациясының президенті Мерхат Болатқанұлының айтуынша, бүгінде қылмыстық атқару жүйесінде қызмет етіп жүрген Әсел Жұмақаева бұған дейін де республикалық, халықаралық жарыстарда тәуір нәтижелер көрсетіп жүретін. Дегенмен бұл жолғы жетістігінің орны бөлек. Әсел мықтылардың мықтысы қатысатын жаһандық доданың күміс медалін иеленді. Маман мұны сенсацияға балап отыр.

Айта кетейік, дүбірлі додаға 37 мемлекеттен 204 саңлақ қатысыпты. Еліміздің намысын қорғаған спортшылар біріншілік қорытындысы бойынша бес алтын, алты күміс, 10 қола, барлығы 21 медальды қоржынға салып, командалық есепте екінші орынды иеленген екен. Әсіресе өз салмақтарында топ жарған Қ.Сағын, Ұ.Мұқашев, Н.Бекбатшаев пен К.Сағындықованың жетістіктерін атап өткен орынды.

Сонымен қатар бұл жарыста ел Қарулы Күштерінің қызметкері, майор Е.Түсіпханов чемпионаттың ең үздік судьясы атағына ие болған-ды.