AMANAT партиясының мобильді қоғамдық қабылдауы «Құқықтық көмек» жобасы аясында Өскемен және Риддер қаласы тұрғындарының жеке мәселелерін тыңдады.

Республикалық қоғамдық қабылдау бөлімінің кеңесшісі Ардан Аралбай, AMANAT партиясы ШҚО филиалының төрағасы Сайрангүл Жұмаділова, ШҚО Әділет департаментінің басшысы Айгүл Түктібаева, ШҚО бойынша жеке сот орындаушыларының өңірлік палатасының басшысы Санат Абдрахманов, сондай-ақ заңгерлер мен адвокаттар қала тұрғындарын қабылдап, сұрақтарына жауап берді, деп хабарлайды Altaynews тілшісі.

Облыс орталығының тұрғындары сот шешімімен келіспеу, алаяқтық және «ҚР зейнетақымен қамсыздандыру туралы» Заңға өзгерістер мен толықтырулар енгізу туралы мәселелер көтерген.

Ал Риддер қаласында өткен қоғамдық қабылдау кезінде тиісті басқармалардың басшылары мен орынбасарлары қаладағы өзекті мәселелер бойынша тұрғындардың арыз-шағымын тыңдады.

Мобильді қоғамдық қабылдау әрбір азаматтың өтінішін назардан тыс қалдырмайды және оны заң шеңберінде шешуге ықпал етеді. Ал қалалық, облыстық және республикалық деңгейде қаралатын мәселелерді тиісті мемлекеттік органдармен бірлесіп шешетін болады.