Өскемен қаласындағы «Шығыс» өңірлік қолбасшылығының 3477 әскери бөлімінің Дағдарысқа қарсы оқу орталығының базасында батальондар командирлерімен практикалық дайындық бойынша бес күндік жиын басталды. Кәсіби деңгейін жетілдіруге еліміздің барлық өңірлерінен елуден астам офицер қатысуда.

Жиын бағдарламасына сәйкес, бес күн ішінде батальондық буын офицерлерінен әскерлердің қызметтік-жауынгерлік қызметінің негізгі басымдықтарын, әскери жарғыларды, оның ішінде атыс, дене шынықтыру, әскери-инженерлік даярлық, РХБЗ және техникалық даярлық бойынша практикалық дағдыларды айқындайтын басшылық құжаттар мен директиваларды білу секілді сынақтар қабылданатын болады, деп хабарлайды Altaynews тілшісі.

Қару-жарақ пен әскери техниканың, арнайы құралдардың, байланыстың тактикалық-техникалық сипаттамаларын білу, мемлекеттік-құқықтық, әдістемелік даярлық және әскери топография бойынша теориялық және практикалық сабақтар өткізіледі.

Алғашқы күні офицерлер таңертеңнен бастап дене шынықтыру, мемлекеттік-құқықтық дайындық, сондай-ақ басшылық құжаттар мен жалпы әскери жарғы бойынша сынақтар тапсырды.

Екінші күні Дағдарысқа қарсы оқу орталығының полигонында әртүрлі позициялар мен қару-жарақ түрлері арқылы ірі калибрлі пулеметтерді ату бойынша өз шеберліктерін көрсетті.

Айта кету керек, жиын 15 қыркүйек күні қорытындыланып, Үздік офицерлер ҚР Ішкі істер министрінің орынбасары – Ұлттық ұланның Бас қолбасшысы генерал-лейтенант Еркін Ботақановтың атынан грамоталармен және бағалы сыйлықтармен марапатталады.