Пәтерде температура төмен деп шағымданған Риддер тұрғындарының үйіне мамандар барып, жылуды тексерді. Инженерлер ғимараттардың контурын жылылау қажет деген қорытынды шығарды, деп хабарлайды Altaynews.kz тілшісі.

Күрделі жөндеуден кейін кеншілер шаһарындағы жылу электр орталығы штаттық режимде үзіліссіз жұмыс істеп тұр. Мұны кеше өңірлік коммуникациялар қызметінің алаңында өткен брифингіде қала әкімі Дәулет Батырбаев та растады.

Дегенмен кейбір қала тұрғындары пәтерде температура төмен екенін айтып шағымдануда. Жылудың шын мәнінде қайда кетіп жатқанын анықтау үшін «Өскемен жылу желілері» АҚ-ның жөндеу-пайдалану қызметі өлшеу, баптау және сынау қызметінің өкілдерімен бірлесіп Гагарин көшесіндегі 20-шы үйге және Белинский көшесндегі 25-ші үйге барып, термовизиялық тексеру жүргізді.

Мамандар арнайы құрылғының көмегімен жылудың терезе блоктарынан, қоршау құрылымдары мен шатырдан сыртқа кетіп жатқанын анықтады. Инженерлер қажетті температуралық режимді қамтамасыз ету үшін ғимараттардың контурын жылылауды ұсынды.