Бұған дейін біз, Өскемендегі Назарбаев зияткерлік мектебінің оқушысы Әбілмансұр Жүніскенов осындай өнертабыс ойлап тапқанын жазғанбыз. ШҚО әкімі Ермек Көшербаев нейрохирург-мамандармен кеңесе отырып, стартап-жобаны дамыту қажет екенін атап өткен болатын.

Жақында Әбілмансұр ШҚО мамандандырылған медициналық орталығының инновациялық медицина бөлімінде болды. Облыстың жетекші нейрохирургтары Юрий Старокожев, Жандос Уап, Дмитрий Недбайло, Мұхтар Қорабаев өнертабыстың бірегейлігін және оның медицинада қалай көмектесе алатынын атап өтті, деп хабарлайды Аltaynews.kz тілшісі.

Жас өнертапқыш дәрігерлерге өз жобасын таныстыра отырып, інісіне көмектесу туралы ой оны осындай құрылғы жасауға итермелегенін айтты.

ШҚ мамандандырылған медициналық орталығы инновациялық медицина бөлімінің меңгерушісі Жандос Уаптың айтуынша, бұл құрылғы дәл қазір өте өзекті. Өйткені, құрылғыны үйде де, медициналық мекемелерде де терапия сеанстарында қолдануға болады. Толық пайдалану үшін функционалдылықты жетілдіру қажет. Олар бұған көмектесуге, бағыттауға, кеңес беруге дайын.

Айна Ескенқызы