ШҚО-да тілдік пәндердің мұғалімдеріне 1 млн. теңгеге дейін сыйақы беріледі
Аймақта облыс әкімінің тапсырмасымен тілдік пәндердің мұғалімдерін ынталандыру мақсатында, сыйақы төленетін болды, деп хабарлайды Алтайньюс тілшісі.
- СЕLTA сертификаты бар біздің жаттықтырушылардың тіл оқытуына бюджеттен қосымша қаржы бөлінбейді. Бірақ мен Білім басқармасына халықаралық емтихан қорытындысы бойынша жақсы деңгейге шыққан жаттықтырушыларға қаржылай сыйақы қарастыруды тапсырамын, - деді Даниал Ахметов тамыз конференциясының отырысында.
Халықаралық емтихандардың және білім алушылардың білім сапасына диганостика жасау нәтижелері бойынша 2017 жылы 12 мұғалім, ал осы жылы – 18 мұғалімге сыйақы қарастырылған.
Бір реттік сыйақының мөлшері - 170 мың теңгеден 1 млн. теңгеге дейін.
Сонымен қатар, білім берудің жаңартылған мазмұнын енгізу аясында жаратылыстану-ғылыми топтамасындағы жекелеген пәндерді ағылшын тілінде оқытуды енгізу бойынша жұмыстар атқарылуда. Осы мақсатта облыстың 82 мектебінде сабақ беретін В1 және В2 деңгейіндегі 730 мұғалім даярлықтан өтті. Олар еңбекақыларына қосымша 30% мөлшерінде үстеме алатын болады.