"Алтай" екінші кездесуін де жеңіспен аяқтады
Облыс орталығында өтіп жатқан волейболдан қыздар командалары арасындағы клубтық Азия чемпионатында жеңілістің кермек дәмін татпаған үш ұжым бар болса, соның бірі - өскемендік "Алтай".
Юрий Панченконың шәкірттері жаңа ғана аяқталған матчта 3:1 есебімен тайбэйлік "СMFC" командасынан басым түсті, деп хабарлайды Алтайньюс тілшісі.
Дегенмен алтайлықтар үшін бұл кездесу сәтті басталды деп айта алмаймыз. Ойынды сылбыр бастаған алаң иелері бірінші партияда 21:25 есебімен жеңіліп қалды.
Үзілісте бас бапкер "Алтайдың" тактикасына біраз өзгертулер енгізсе керек, екінші кезеңде өскемендік команданың ойыны түрленіп сала берді. Шабуылдарының нәтижелілігі біршама артқан "Алтай" волейболшылары бұл партияны 25:18 есебімен өз пайдасына аяқтады.
Үшінші кезеңде қазақстандық команданың басымдығы тіптен айқын болды. 25:13.
Тек төртінші партияда ғана Тайбэй чемпионы есін жиіп, "Алтайға" бәлендей қарсылық көрсеткендей болды. Дегенмен, бұл кезеңде де жерлестеріміз жеңісті қолдан бермеді. 25:23.
Қорытынды есеп 3:1.
Осы жеңісінен кейін өскемендік ұжым "В" тобында жеке-дара көш бастады.