Өскеменде азық-түлікті арнайы арзан бағамен сататын әлеуметтік дүңгіршектер ашылатын болды, деп хабарлайды Аltaynews.kz тілшісі.
Облыс әкімінің тапсырмасымен ұйымдастырылып жатқан дүңгіршектердің саны 33 болады деп жоспарланып отыр.
Алдағы күндері қала көшелеріне әзірге 8 дүңгіршек орнатылмақ. Олар сарғыш-жасыл түспен ерекшеленіп тұрады. Сауда нүктелерінде тұрақтандыру қоры мен «Дина» базарының өнімдері еш делдалсыз және үстеме бағасыз сатылады деп күтілуде.
Қала әкімінің орынбасары Мақсұт Исаховтың айтуынша, Өскеменде азық-түлік бағасының көтері-луіне жол берілмек емес. Қалалық әкімдік пен өндірушілер арасында меморандум бекітілген. Әлеуметтік сауда нүктелерінде нан – 45, сүт – 155 теңге болып қала береді. Нан биыл қымбаттамайды, себебі, егін мол, бидай бағасы арзан.