Қазақстандағы футболдың 100 жылдығының аясында Шәкәрім атындағы Семей мемлекеттік университетінің спорт кешенінде футзалдан біріншілік өткізілді. Қалалық жарыста шаһарымыздың 5 жоғары оқу орнынан 8 команда бақтарын сынасты, деп хабарлайды Altaynews.kz .

Аталмыш шараға Семей қаласындағы АҚ «Алтел» “Pathword” және “JET” сауда маркалары демеушілік танытты. «Жастарды спортқа тартудың жеңіл түрлерінің бірі – ол қолдау көрсету. Бүгінде ақпараттық байланыс маркалары жүлделі орындарға ұялы телефондар, флеш – модемдер және де көптеген ұсақ сыйлықтар тігіп отыр. Өз тарапымыздан біз оларға алғыс айтамыз, ал ойыншыларға тек сәттілік тілеймін», - деді университеттің халықаралық қатынас және тәрбие ісі жөніндегі проректоры Б. Атантаева ашылу салтанатында.

Үш күнге созылған турнирдің қорытындысы бойынша Шәкәрім атындағы СМУ-нің екі бірдей командасы жүлделі 1, 2 орындарды қанжығаларын байласа, 3- орынды СМПИ-ның командасы иеленді.

Демеушілер жүлделі 1- орынды алған жеңімпаздардың әрқайсысына ұялы телефон сыйлады. Сонымен қатар, командалардың бапкерлері де құр қалған жок, себебі осындай жетістік көрсетіп отырғандары, тек бапкерлердің арқасы. Шәкәрім атындағы СМУ-і командаларының бапкері Г. Заякин мен СМПИ-нің бапкері В. Орлов марапатталды.

Футбол ұл балалардың ең сүйіп ойнайтын спорттың бір түрі екені бәрімізге мәлім. Қазіргі жастардың салауатты өмір салтына бейімделіп, аталмыш жарыстарға белсене қатысқандығы қуантады.

Қарлығаш Хауасбаева