Анау-мынау мәшине емес, комбайнның астына түсіп, нешеме күн ветеринарлық клиникада ес-түссіз жатқан Оскар атты мысық аяғында артқы екі аяғынан айырылып, бірақ оянды.

Адамнан гөрі төрт аяқтыларды жақсы көретін британдық ерлі-зайыпты Майк пен Кейт Ноландар осыдан кейін-ақ бәрін жиып қойып, «сүйіктілерін» екі аяқпен болса да, жүргізуге тырысып бақты. Сөйтіп, олар көп сұрастыру нәтижесінде елдің Сюррей графтығынан Ноэл Фитцпатрик атты нейроортопед-дәрігерді тауып, Оскарды алып барған-ды. Арада алты ай өткенде Годалминг қалашығындағы меншік клиникада Оскарға биомеханика саласындағы ерекше операция жасалды және ол өте сәтті болып отыр. 6 сағатқа созылған ота үшін Ноландар бақандай 6 мың доллар төлеген көрінеді.

Ең бастысы, «өліп-тірілген» Оскар қазірде темір аяқтарына әбден үйренген, дамылсыз жүгіріп, қожайындарының «көз қуанышы» болып жүр.