Өскеменнің Спорт сарайындағы хоккей мен мәнерлеп сырғанау секцияларына балалар 4-5 жастан бастап қабылданады, деп хабарлайды Алтайньюс тілшісі.

Онда келушілерді Ерлан Сағымбаев, Игорь Елисеев сынды  білікті бапкерлер жаттықтырады. Бұл күнде шайбалы хоккей клубында жаттығып жүргендердің ұзын саны – 650. Ал Спорт сарайындағы «Жұлдызша» атты мәнерлеп сырғанау клубында тоқсанға жуық бүлдіршін тәрбиеленуде. Клубтың директоры Игорь Елисеевтің айтуынша, мұнда оқу-жаттығу жұмыстары ақылы түрде жүргізіледі. Онда алты білікті жаттықтырушы жұмыс істейді. Оқу бағасы 20-40 мың теңгенің аралығында.

– Мәнерлеп сырғанаудан бөлек, би үйірмесі бар. Оған қатысушылар үш жастан бастап қабылданады. Негізі, біз бұл үйірмеде жаттығатын әрбір тәрбиеленушінің болашағынан үлкен үміт күтеміз. Бұрынғыдай емес, қазір ата-аналардың көбі мәнерлеп сырғанауға қызығушылық таныта бастады. Меніңше, бұл біздің қоғамның салауатты өмір салтын ұстануға деген зор құлшыныстарын байқатады, - дейді Игорь Елисеев.

Бокспен айналысамын деген балаларға да мұнда барлық жағдай жасалған. Спорттың бұл түрімен шұғылданғысы келетін жасөспірімдерді білікті бапкер, еліміздің еңбек сіңірген жаттықтырушысы Ержан Шегенов дайындайды.

Бокс секциясына қатысу үшін арнайы нормативтерді тапсыру қажет екенін айта кеткен орынды. Кейін жаттықтырушы баланың икеміне қарай оған бағыт-бағдар береді.

–Спорттық жаттығулар ақылы түрде жүргізіледі. Тек әлеуметтік жағдайы төмен, сондай-ақ көпбалалы отбасыларда тәрбиеленіп жатқан балалар мен мүмкіндігі шектеулі жандар ғана тегін жаттыға алады, - дейді мұндағы мамандар.