Ақтау қаласында ел Президентінің жүлдесі үшін өтіп жатқан VI Халықтық ойындарда шығысқазақстандық балуандар тамаша нәтиже көрсетті, деп хабарлайды Алтайньюс тілшісі.

Атап айтқанда, қазақ күресінен өткен сайысқа қатысқан бес бірдей жерлесіміз жүлделі орындарға ие болып, Шығыс Қазақстан күрес мектебінің шоқтығы биік екенін тағы бір мәрте дәлелдей білді. Бір қызығы, бес балуанымыздың төртеуі алтыннан алқа тақты.

Ал енді сол жерлестеріміздің есімдерін атап өтсек, 66 келіге дейінгі салмақта өнер көрсеткен Талғат Тұрсынов тұғырдың ең биік сатысына көтерілсе, дәл сондай жетістікке Әсет Ахметжанов (90 келіге дейінгі салмақ), Мұхит Тұрсынов (100 келіге дейін) пен Айбек Нұғымаров (түйе балуан) та жетті. Тағы бір жүлдеге 100 келіден жоғары салмақ дәрежесінде екінші орын алған Әділ Оразбаев ие болды.