«Қазақ тілі» қоғамының өкілдері Риддер тұрғындарын Көрісу күнімен құттықтады
" allowfullscreen>Наурызнаманың онкүндігі аясында «Қазақ тілі» халықаралық қоғамының мүшелері Риддер тұрғындарын Көрісу күнімен құттықтады, деп хабарлайды Altainews.kz тілшісі.
– Біздің тобымызда он адам бар. Өзімізбен бірге құрт, бауырсақ, ірімшік, тәтті-тәпсек секілді «наурыз-базарлық» ала жүріп, қала тұрғындарын құттықтап, жөн-жоралғы жасаймыз. Сондай-ақ барша адамға «Наурызама» ашықхаттарын табыстаймыз. Бұл ашықхаттарда Ұлыс күнін мерекелеу тұжырымдамасы егжей-тегжейлі жазылған», - дейді «Қазақ тілі» қоғамының мүшесі Құралай Кәукенқызы.
«Қазақ тілі» халықаралық қоғамының мүшелері тұрғындарды құттықтап ғана қоймай, айтулы күннің рәсімін көрсетеді.
– Бүгін туыс-туған, көрші-қолаң, дос-жаран бас қосып, өткен күннің өкпе-назын ұмытып, тату-тәтті қарым-қатынас орнатады. Сондай-ақ «Жаңа жасың құтты болсын!» деп тілек айту ләзім. Біз осы бір игі салт-дәстүрді кең насихаттағымыз келеді, – дейді спикер.
Іс-шараны ұйымдастырушылар бүгін қала әкімдігіне, Батыс Алтай мемлекеттік қорығына, қаладағы музыка мектебіне, №14, №16 орта мектептер мен «Шаңырақ» орта мектебіне, Риддер колледжіне, Халыққа қызмет көрсету орталығына және қаланың басқа да әлеуметтік нысандары мен мекемелерін аралап шығады.
Оқи отырыңыз
