Қазақстандықтардың несие қарызы 6 триллион теңгеден асты
2019 жылдың басында қазақстандықтардың қаржы институттары алдындағы жиынтық несие қарызы 6 триллион теңгеден асты, деп хабарлайды Алтайньюс тілшісі.
Бірінші несие бюросының мәліметінше, бұл 2018 жылмен салыстырғанда 15 пайызға көп. Ranking сарапшыларының айтуына қарағанда, тұтынушылар тарапынан кепілсіз тұтынушылық несиелер зор сұранысқа ие: 49,7 пайыздан 54,1 пайызға дейін өскен. Тағы бір үрдіс – онлайн-несиелендірудің қарқынды өсуі. Аталмыш сегментке қарыздардың 2,5 пайызы кіреді, бұл 2017 жылға қарағанда 0,8 есеге көп.
Нарықтағы орташа мөлшерлеме күніне - 0,21 пайыз, жоғары мерзім - 21-ден 90 күнге дейін, сонда ең жоғары сома – 300 мың теңгені құрайды.
Жалпы онлайн несие беруді банктердің өздері де ұсынатын көрінеді. Айта кетейік, кепілсіз тұтынушылық кредиттер беретін 18 екінші деңгейдегі банктердің ішінде онлайн-қарызды төрт банк беруге дайын: Altyn Bank, Capital Bank (Алматы және Астана үшін), Kaspi Bank және Сбербанк. Осының ішінде онлайн-қарыздар бойынша ең төменгі тиімді мөлшерлемені Kaspi Bank (23,6 пайыздан), Сбербанк (26,1 пайыздан) және Capital Bank (33,2 пайыздан) ұсынады.
Сарапшылардың мәліметіне сүйенсек, шағын несие беру үлесі де өскен: 5,2 пайыз болды, бұрын 4,6 пайыз еді. Ал екінші деңгейлі банктердің үлес салмағы керісінше 93,2 пайыздан 92,2 пайызға дейін азайғанын айтады мамандар.