Күршімде 19-қаңтарда ҰБТ өтеді
2019 жылы елімізде ұлттық бірыңғай тестілеу төрт рет — қаңтар, наурыз, маусым, тамыз айларында өткізілмек. Аудан орталығындағы Күршім гимназиясы базасында сенбі күні, 19-қаңтарда, өтетін тестілеу ақылы негізде өтеді, құны — 2242 теңге, деп хабарлайды Алтайньюс тілшісі.
- Қаңтар, наурыз, тамыз айларында өтетін тестілеуге қатысу арқылы мектеп түлегі жоғары оқу орындарының ақылы бөліміне құжат тапсыру мүмкіндігіне ие болады. Қаңтарда шекті балды жинаған тестке қатысушы ҰБТ сертификатымен ЖОО-ға коммерциялық негізде оқуға түседі. Сонымен қатар, ҰБТ-ны қаңтарда тапсырғандар негізгі ҰБТ-ны маусым айында тегін тапсырып, мемлекеттік білім беру гранттарын беру конкурсына қатыса алады,-дейді аудандық білім бөлімінің әдіскері Ернар Жайлмысов.
- Қаңтар айындағы тестілеуге қатысу үшін 67 оқушыдан өтініш түсті. Олар - №1 Марқакөл, №2 Теректі, Құйған, Сарыөлең, Қаратоғай және №1,№4 Күршім орта мектептері мен Күршім гимназиясының оқушылары. Оқуға түсуші дәстүрлі түрде 3 міндетті пән, Қазақстан тарихы, математикалық сауаттылық, оқу сауаттылығы және екі бейіндік пән бойынша тестілеуден өтеді,-деп ата-аналар мен мектеп түлектері үшін сын сағат жөніндегі ақпаратпен бөліскен Ернар Маратұлы.