Өскемен қаласының басшылығы шеткі аудандарды абаттандыру жобаларын сәтті жүзеге асырып жатқанын бұған дейін де айттық. Мәселен, өткен жылы Жаңа Согра ауданындағы Фасадная көшесіндегі скверді абаттандыруды қолға алған болатын.

Сквер енді үлкен-кішіге бірдей демалыс орнына айналды, деп хабарлайды Altaynews тілшісі. 

Біріншіден, мұнда жарықтандыру жүйесі орнатылды. Кертпе-тастан жол төселді. Жол жиегіне жаңа орындықтар қойылды. Оған қоса балаларға арналған нысандар орнатылды.

Жаңа Сограға жұмыс сапарымен барған қала әкімі Жақсылық Омар жаңа футбол алаңын ашып, жастарға футбол доптарын тарту етті.

– Соңғы уақытта көптеген мәселелерді тұрғындармен бірлесе отырып шешіп келеді. Бастапқыда согралықтар демалуға арналған орын жоқ екенін айтқан еді. Біз скверді жабдықтадық. Ал былтыр аудан тұрғындары балаларға футбол алаңы керектігін алға тартты. Биыл, міне, футбол алаңын салып, скверді қосымша абаттандырдық. Бұл жер енді аудан тұрғындарының сүйікті орнына айналды. Жаңа Согра тұрғындарының белсенділігі мен ауызбіршілігін атап өткім келеді. Осындай адамдары бар аудандарымыз мен жалпы қаламыз әрдайым жақсара түседі, – деді Жақсылық Омар.

Қала әкімі Согра ауданындағы Шаяхметов көшесі қайта құрудан өткенін атап өтті. Сондай-ақ кәріз жүйесі жаңартылып жатыр, бұл жұмыс қыркүйек айында аяқталады.

Сондай-ақ облыс орталығының басшысы жергілікті тұрғындардың ұсыныстарын, өтініш-тілектерін тыңдап, жауапты бөлімдерге тапсырма берді.