Шығыс Қазақстанда қыс маусымында жолдардың қарын күрейтін 838 техника жасақталған. Өңірде облыстық және аудандық маңызы бар автомобиль жолдарын қыс мезгіліне дайындау жұмыстары қызып тұр қазір.

Облыстық жолаушылар көлігі және автомобиль жолдары басқармасы басшысының міндетін атқарушы Ерлан Уәлиев бұл бағытта атқарылып жатқан жұмыстардың барысы туралы айтып берді, деп хабарлайды Altaynews.kz сайты. 

Белгілі болғандай, бұл бекеттерде жолаушыларға арналған төсек-орындар болады, сондай-ақ олар жанар-жағармай, көмір, су  және үш тәулікке жететін азық-түлікпен қамтамасыз етіледі.

Сондай-ақ 1 қарашадан бастап жолдардың жай-күйі, оларға жіберілген техниканың саны жайында хабарлайтын кезекшілік қызмет ұйымдастырылып, уақтылы ақпарат таратып отыратын болады.

Жолдарды күтіп ұстау және қалпына келтіру жұмыстары үлкенді-кішілі елді мекендерде де қызу жүргізілуде. Мәселен, ағымдағы жылы Өскемен қаласында 100 аулаішілік жолды жөндеу жобасы қолға алынған. Күн суытпай тұрып қаладағы бірқатар аулаішілік жолға орташа жөндеу жүргізілетін болады.

Әрине, абаттандыру жұмыстарын да назардан тыс қалдырмаған жөн. Облыстық құрылыс, энергетика және тұрғын үй-коммуналдық шаруашылық басқармасынан хабарлағандай, өңірдің кей ауданында жоспарланған абаттандыру жұмыстары аяқталуға жақын.

Атап айтсақ, биыл Риддердің орталық бөлігінде елеулі өзгерістер болғанын байқауға болады. Салалық басқарманың ТҮКШ, сумен жабдықтау және су бұру бөлімінің басшысы Рауан Тұрысбектің айтуынша, қазіргі уақытта кеншілер шаһарында жоспарланған жобалардың барлығы бойынша жұмыстар аяқталған.

Оның айтуынша, Риддердің орталығындағы ашық алаңдар мен жаяу жүргіншілер аймақтарында тротуар плиталар төселіп, автотұрақ ретке келтірілген. Сонымен бірге кеншілер шаһарында балаларға арналған жаңа ойын алаңқайлары, спорт пен воркаут алаңдары пайда болды. Жақын арада қаланың орталық бөлігіне үлкен LED экран да орнатылмақ.

Аудандарда да біраз шаруа тындырылған көрінеді. Мәселен, жақында Самар ауылында жаңа Даңқ паркі ашылуы керек. Мердігер ескерткіштің негізгі құрылыс жұмыстарын аяқтап, аумағындағы жолдарға төсеніш төсеген. Қазір саябақты жарықтандыру және шағын сәулет нысандарын орнату жұмыстары ғана қалды.

Сол сияқты Күршім ауылында да орталық саябақты қалпына келтіру жұмыстары жүргізілуде. Алдымен саябақ ішіндегі қираған нысандарды бөлшектеп, аумақты тазартқан. Қазір паркте су жаңа футбол мен баскетбол алаңдары, сондай-ақ балалардың ойын алаңқайы бар. Енді, демалыс орнының аумағын жарықтандыру  ғана қалды. Бұған қоса қазан айында саябаққа ағаш көшеттері отырғызылмақ. Жалпы, барлық жұмысты қараша айында аяқтау жоспарланған, дейді мамандар.

Сондай-ақ алдағы уақытта Тарбағатай ауданының орталығы Ақжар ауылында да ауқымды абаттандыру жұмыстары қолға алынбақ. Атап айтсақ, елді мекеннің Жамбыл көшесінде демалыс аймағын салу көзделген.