Облыстың атын асқақтатып жүрген студенттік команда – ШҚО
Елде бұқаралық спортқа ерекше назар аударылып жатыр. Ел Президенті Қасым-Жомарт Тоқаев оны дамыту аса маңызды екенін айтқан. Осы мақсатта Д.Серікбаев атындағы ШҚТУ-да жүйелі жұмыс қолға алынған. Өнертапқыштар мен технология саласының үздіктерін оқытатын ұстаханаға айналған оқу орнының басшылығы студенттерінің оқуда ғана емес, спортта да үздік болуына жағдай тудырған.
Аталған оқу орнының волейбол құрамасы елеулі жетістікке жетіп, мүшелері ел байрағын әлемдік жарыстарда желбіретіп жүр, деп хабарлайды Altaynews тілшісі.
Аталған оқу орнының студенттері спортты оқумен қатар ала жүріп, түрлі жетістіктерге жетіп жатыр. Мамандығы спорт саласына қатысты болмаса да, жүлделі орындардан көрініп жүрген жастардың ынтасы зор.
Суденттерден құралған құраманың қоржынында халықаралық және республикалық жарыстардың жүлдесі бар. Олар өңір атын дүбірлі жарыстарда әйгілеп жүр. Студенттер 2018 жылы Баку қаласында өткен Бірінші түркі спорттық ойындарына (Дүниежүзілік Түркі Универсиадасы) елдің атынан қатысып, 3-орынды иеленді. 2018 жылы жоғары оқу орындарының арасында өткен ШҚТУ-дың 60 жыл мерейтойына арналған республикалық турнирде 12 команданың арасынан топ жарып шықты. Ал 2023 жылы жоғары оқу орындарының арасында өткен республикалық спорттық лигада 60-тан астам командамен бәсекелесіп, ақтық ойынға 14 команда жолдама алған. Осы ойында ШҚТУ командасы үшінші жыл қатарынан қола медаль иегері атанды. Құрама мүшелерінің жетістігі команданың нәтижесінен қалыс қалмайды. 2021 жылы XI Жазғы универсиадада жағажай волейболынан ерлер арасында өткен сайыста Ади Әбіш пен Абзал Дүйсембекұлы 2-орын алды. Осы додада әйелдер арасында Назерке Байтұрсын және Гүлсана Төлеуғалиқызы да 2-орыннан көрінді.
Аталған оқу орнындағы Денсаулық және спорт орталығының басшысы Болатбек Даумовтың айтуынша, студенттердің қабілетін шыңдау үшін оларға түрлі жаттығу істететін көрінеді.
Спортпен айналысу еңбек жолында да септігін тигізеді.
Қазіргі таңда құраманың кейбір мүшесі спортты тек қызығушылық ретінде қалдырмай, кәсібіне айналдырған. Ади Әбіш «Алтай» волейбол клубының ерлер ұлттық лигасының негізгі құрамында жүрсе, Мирас Дәлелханов пен Абзал Дүйсембекұлы 2020-2022 жылдары Көкшетау қаласының Жоғары лигадағы «Ұшқын» құрамасында өнер көрсетті.
#kzdayrepublic
#republicdaykz
