ШҚО ТЖД мамандары мұз үстінде болатын қайғылы оқиғалардың алдын алу мақсатында «Мұз 2024» акциясын қайта қолға алды, деп хабарлайды Altainews.kz тілшісі.  

«Мұз 2024» – қысқы балық аулаудың қауіптілігі мен қауіпсіздік ережелерін қатаң сақтаудың маңыздылығын еске салуға бағытталған республикалық акция.  

Өңірде су қоймалары аз емес. Осы су қоймаларында балық аулауға әуес тұрғындардың саны жыл сайын артып келеді. Қыста мұз үстінде отырып балық аулайтын адамдар қызығушылығын ерте бастау үшін мұзы әлі қатпаған су қоймаларына шығып кетеді. Жыл басынан бері өңірде көктем-күз мезгілдерінде балық аулау барысында 4 адамның суға кету фактісі тіркелген.  

Мұз айдынындағы қауіпсіздік туралы халықты құлақтандыру үшін төтенше жағдай қызметкерлері әлеуметтік желілерде, бұқаралық ақпарат құралдарында ақпараттар жариялап, мектептерде оқушылармен кездесулер өткізуде. Сонымен қатар балық аулау мен аңшылыққа арналған дүкендерде рейдтер ұйымдастырылып, қысқы балық аулаудың қауіптілігі мен қауіпсіздік ережелерін сақтау қажеттілігі түсіндірілуде.  

Қысқы балық аулау кезінде балықшылардың жанында құтқару құрал-жабдықтары болуы шарт. Әйтпеген жағдайда, 25 мың теңге көлемінде айыппұл салынуы мүмкін.  

Міндетті жабдықтардың қатарында құтқару күртешелері, ағаш таяқ, диаметрі 11 мм-ден кем емес кендір жіп, ысқырауық және мұзға қадауға арналған біз болуы тиіс.  

Айта кетейік, ШҚО ТЖД қызметкерлері мұздың қалыңдығы кемінде 10 см болмаған жағдайда адамдарға, ал 25 см болмаған жағдайда көліктерге мұз үстіне шығуға болмайтынын еске салады.  

Ақерке Рағызбаева  
Фото, видео: Жәнібек Ырысбай