Алтай ауданының әкімдігі әлеуметтік маңызы бар азық-түлік тауарларының бағасын тұрақтандыру шаралары бойынша кеңес өткізді. 
Кәсіпкерлік бөлімінің басшысы Сахариев М.А. бағаны тұрақтандыру шаралары туралы баяндады. Алтай қаласында алты мониторингтік топ құрылып, ӘМАТ бағалары апта сайын жергілікті «Заря Востока» газетінде жарияланып отырады. Жедел әрекет ету шарасы ретінде дүкендермен 15% сауда үстемесін сақтауға қатысты түсіндіру жұмыстары жүргізілуде.

Аудан әкімі Құрмамбаев Р.Т. негізгі әлеуметтік маңызы бар азық-түлік бағаларын реттеу және тұрақтандыру үшін бірқатар шаралар жалғасатынын атап өтті. Атап айтқанда, Алтай ауданының ауылдық округтерінен тікелей картоп жеткізілімін ұйымдастыру қолға алынбақ. Әр апта сайын арзандатылған бағамен ауыл шаруашылық жәрмеңкелері өтеді, сондай-ақ Алтай қаласында әлеуметтік дүкендер ашылған.

Ауданды әлеуметтік бағамен картоппен қамтамасыз ету, көкөніс өнімдерінің, әсіресе картоптың егіс алқабын ұлғайту мәселесі қарастырылды.

Алтай ауданының прокуроры Рыспаев Е.Е. бүгінгі таңда ӘМАТ бағаларының тұрақты екенін атап өтті. Халық арасында сұранысқа ие негізгі көкөністер – картоп, қызылша, сәбіз және пияз. Прокурор әлеуметтік маңызы бар тауарлар бағасының тұрақтылығын сақтау үшін мониторингтік топтардың жұмысын бақылау-фискалдық және құқық қорғау органдарын тарту арқылы күшейту қажет екенін айтты.

Кеңесте әлеуметтік маңызы бар азық-түлік өнімдерін сату талаптарының сақталуын мемлекеттік бақылау нәтижелері талқыланды. Кәсіпкер Мұхитдин Нұрахунов Алтай қаласында көкөніс сақтауға арналған қойма ашу туралы ұсыныс білдірді.

«Фермер» дүкенінің иесі Фатима Газахунова бағаны ұстап тұрғанын, мысалы, картопты 300 теңгеден сатып отырғанын, себебі оны күзде көп көлемде сатып алғанын айтты.

Аудан әкімі ауыл шаруашылық өнімдерін өңдеуге назар аудару қажеттігін айтты. Ауыл әкімдеріне ауыл тұрғындарын кәсіпкерлікке тарту тапсырылды, ол үшін түрлі бағдарламалар қарастырылған. Әлеуметтік осал топтарға 400 АЕК мөлшерінде гранттық қаржыландыру ұсынылады, сондай-ақ «Ауыл Аманаты» бағдарламасы бар. Инвестициялық процестер ауылдық аумақтарды дамытудың бір бағыты ретінде қарастырылады. Инвестициялар инновациялық шешімдерді енгізуге мүмкіндік беріп, ауыл экономикасының негізін нығайтады.