Өскемен жылу орталығында «Қазақстандық коммуналдық жүйелер» АҚ басқарушы компаниясымен бірлесіп, Жұмысшы мамандықтар жылы аясында «Релейлік қорғаныс және автоматика: өндірістегі жұмысты ұйымдастыру, жас мамандарды даярлау және дамыту перспективалары» тақырыбында дөңгелек үстел ұйымдастырылды, деп хабарлайды Altainews.kz тілшісі.

«Қазақстандық коммуналдық жүйелер» АҚ техникалық директоры Айдын Бексолтанның айтуынша, коммуналдық жүйелер саласы үнемі жетілдіріліп, жаңа технологиялар енгізіліп, жұмыс тиімділігі артып келеді. 

«Өскемен ЖЭО» кәсіпорнының корпоративтік оқу орталығының жетекшісі Наталья Слабодчикова бұл шараның ерекше маңызға ие екенін атап өтті. Себебі Президент 2025 жылды Жұмысшы мамандықтар жылы деп жариялаған болатын.

Өскемен жоғары политехникалық колледжі 70 жылдан астам уақыт бойы осы салаға мамандар даярлап келеді. Бүгінде «Өскемен ЖЭО» қызметкерлерінің едәуір бөлігі – осы колледждің түлектері. Білікті мамандарды даярлау үшін кәсіпорындармен тығыз байланыс орнатылған.

Бүгінде ең сұранысқа ие бағыттардың бірі – IT технологиялар. Сонымен қатар, релейлік қорғаныс саласы да ерекше маңызға ие, себебі бұл терең білімді қажет ететін мамандандырылған бағыт. Бұл сала бүкіл энергетика жүйесін қамтиды, ал релейлік қорғау жөніндегі инженер – жоғары білікті маман. Мұнда толыққанды қалыптасу үшін кемінде 10 жыл тәжірибе қажет.

Колледж директоры Исатай Исин дуалды оқыту жүйесінің маңыздылығына тоқталды.

Іс-шара барысында салаға жаңа шешімдерді интеграциялау, озық технологияларды қолдану және даму стратегиялары кеңінен талқыланды.

Айна Ескенқызы

Фото: Махаббат Ахметжанова

Видео: Жәнібек Ырысбай