Наурыз айынан бастап Шығыс Қазақстан облысының төрт ауданында жұмыс кестесі ресми түрде өзгерді. Енді Тарбағатай, Зайсан, Күршім және Самар аудандарында жұмыс күні таңғы 08:00-де басталып, 17:30-да аяқталады. Түскі үзіліс уақыты – 12:00-ден 13:30-ға дейін, деп хабарлайды Altainews.kz тілшісі.

Жаңа кесте өңірдің табиғи ерекшеліктеріне байланысты енгізілді. Бұл аудандарда күн ерте шығып, ерте батады. Жұмыс уақытын ыңғайлы ету арқылы тұрғындар күндізгі жарықты тиімді пайдалана алады.

Жаңа тәртіп мемлекеттік мекемелер мен кәсіпорындарға қатысты. Алайда, мектептер, балабақшалар және медициналық мекемелердің жұмыс уақыты өзгермейді, себебі олар бұрыннан осындай кестеге сай жұмыс істеп келеді.

Зайсан ауданының әкімі Аэлита Ахметсəлімқызы бұл шешім тұрғындардың пікірі ескеріле отырып қабылданғанын айтты.

Самар ауданының орталық кітапхана директоры Гүлмира Бакиргалова бұл өзгерісті оң бағалады.

Еске сала кетейік, бұл жаңашылдық алғаш рет қаңтар айында Катонқарағай ауданында енгізілді. Ақпан айында Үлкен Нарын мен Марқакөл аудандары жаңа кестеге ауысты.