Ұлыстың ұлы күні Өскемен қаласының орталық алаңына 20 мыңға жуық қала тұрғыны мен қонақ жиналды, деп хабарлайды Altainews.kz тілшісі.

Орталық алаңда спортсүйер қауым үшін гір көтеру, арқан тарту, қол күресі мен қазақ күресі жарыстары өтті. Сондай-ақ, мектеп оқушылары арасында асық ату ұйымдастырылды. Ұтысқа қаржылай сыйақы тігілген бұл спорттық ойындарға қатысамын деушілер көп болды.

Арқан тарту жарысына алаңға жиналған ер азаматтардан тоғыз команда құрылып, өзара күш сынасты. Жеңімпаз атанған алты команда мүшелері ақшалай сыйлықпен марапатталды.

Мерекенің көркін ашқан тағы бір ерекше шара – ұлттық тағамдар жәрмеңкесі болды. Қала кәсіпкерлері жиналған қауымға дәстүрлі қазақ асханасының дәмді тағамдарын ұсынып, қонақтарды наурыз көже мен бауырсақтан дәм татқызды.

Осындай кең ауқымда тойланған Наурыз мейрамы қала тұрғындарына көтеріңкі көңіл-күй сыйлап, халықтың бірлігін нығайта түсті.

Фото: Махаббат Ахметжанова