Наурыз мейрамы – халықтың ұлы мерекесі. Бұл мерекені әрбір өскемендік пен қала қонақтары ерекше сезінуі үшін бірнеше локацияда мәдени-концерттік шаралар ұйымдастырылды, деп хабарлайды Altainews.kz тілшісі.

Достық үйінің алдында Ұлыстың Ұлы күні дүбірлетіп тойланды. Мерекелік шараны Қазақстан халқы Ассамблеясы мен “Казцинк” ЖШС бірлесе ұйымдастырды.

Қазақстан халқы Ассамблеясы мен этномәдени бірлестіктердің өнерпаздары сан түрлі ұлттың ән-билерімен сахнаның көркін қыздырды. Спорттық сайыстарға кейбірі белсенді түрде қатысса, енді бірі жанкүйер болып, қатысушыларға дем берді. Жиналған көпшілік ұлттық дәстүріміздің ажырамас бөлігі саналатын гір көтеру, қой көтеру, қол күресі және арқан тарту сынды жарыстарда бақ сынасты. Жеңімпаздар бағалы сыйлықтармен марапатталды.

Балалар үшін арнайы әзірленген этникалық бағдарламалар мен танымдық ойындар бүлдіршіндерге көтеріңкі көңіл-күй сыйлап, мейрамның мән-мағынасын аша түсті.

Алаңға жиналған жұртшылыққа дәстүрлі наурыз көже, ыстық бауырсақ пен шипалы қымыз ұсынылып, мерекенің сән-салтанаты арта түсті.