Кешкі мерекелік концерт жергілікті және қазақстандық эстрада жұлдыздарының қатысуымен үш сағатқа созылды, деп хабарлайды Altainews.kz тілшісі.  

Жиналған көпшілікке Ұлыстың ұлы күніне арналған ерекше бағдарлама ұсынылды. Өскеменнің өнер сүйер қауымы жергілікті өнерпаздар мен танымал әншілердің өнерін тамашалады. Сахна төрінде қалаға белгілі Ұшқын триосы, жас әнші Ратмир Тұрсынбеков, Х-фактор жобасының қатысушысы Әсем Рыспаева, Non Stop дуэті, Апош Сарбаз, сондай-ақ әнші-композитор Еділ Майзақов әсерлі орындауларымен мерекелік кештің сәнін келтірді.  

Кештің шарықтау шегі ретінде қазақ эстрадасының жарық жұлдыздары Заттыбек Көпбосынұлы, Формат тобының әншісі Қайрат Баекенов және Raim сахнаға шығып, өздерінің хит әндерін орындады.  

Ән мен бидің әуенімен тербелген қала тұрғындары мерекелік көңіл күйге бөленіп, кеш соңында түнгі аспанды жарыққа бөлеген отшашуды тамашалады.  

Ұлыстың ұлы күніне арналған әсерлі кеш қала тұрғындары мен қонақтары үшін ұмытылмас сәтке айналды.

Фото: Жібек Нұрахмет