27 наурызда бүкіл әлемде барша театр қызметкерлерінің кәсіби мерекесі – Дүниежүзілік театр күні аталып өтеді, деп хабарлайды Altainews.kz тілшісі.

Театр – адам жанының айнасы, ой мен сезімнің үйлесімі, өмірдің түрлі қырларын сахнада шебер жеткізетін ұлы өнер. Театр – қоғамның мәдени дамуына ықпал ететін құрал.

Бүгінде Қазақстанда 70 театр жұмыс істейді, олардың 57-сі – мемлекеттік театр. Атап айтсақ, 11 республикалық, 46 өңірлік театр бар. Кейінгі төрт жылда елімізде бес жаңа мемлекеттік театр ашылды. Бұл театр өнерінің дамып келе жатқанын, сұранысқа ие екенін көрсетеді.

Қазақстандық театрлар отандық көрерменді жаңа қойылымдармен қуантып қана қоймай, елімізді халықаралық аренада да танытып келеді. 

ҚР Мәдениет және ақпарат министрлігінің мәліметінше, 2024 жылы 396 гастрольдік сапар ұйымдастырылса, оның 350-і ел ішінде, 46-сы шетелде өтті. Отандық театрларда 9 мыңға жуық маман жұмыс істейді, оның 4 200-і шығармашылық ұжым өкілдері. Бір жыл ішінде Қазақстанның мемлекеттік театрлары 200-ден астам жаңа қойылым қойды, олардың 107-сі отандық авторлардың шығармалары негізінде сахналанған.

Республикадағы жалғыз Оперетта театры

2024 жылдың соңында Қазақстанда алғашқы Шығыс Қазақстан облыстық драма және оперетта театры ашылды. Ол Өскемен қаласында орналасқан. Оперетта театрында алғашқы қойылымдар да сахналанды. Көрермендерге отандық композитор Садық Мұхамеджановтың «Айсулу» операсы мен әйгілі ABBA тобының хиттерімен сүйемелденген «Mamma Mia» мюзиклі ұсынылды.