Өскеменнің іргесіндегі жазық далада осыдан 15 жыл бұрын көп үйлі Шығыс ауылы бой көтерген еді. Мемлекеттің «Нұрлы көш» бағдарламасы аясында шетелден көшіп келген қандастарымызға арналып салынған бұл ауылды халық арасында «Нұрлы көш» деп те атайды. Алыста жүрген ағайынды бір шаңырақ астына топтастырған Шығыста бүгін Ұлыстың ұлы күні – Наурыз мерекесі ерекше дүбірмен тойланды, деп хабарлайды Altainews.kz тілшісі.

Жаңа ауылдағы Жаңа жыл тойы ұлттық спорт ойындарымен басталды. Көкпар, тай жарыс, аударыспақ, арқан тартыс, қол күрес, қазақ күресі сияқты жарыстарда спортшылар бақ сынасты. Жарыстар қой көтерген, тай көтерген балуандар бәсекесіне ұласып, дала ұлдарының күші мен ақыл-айласы сынға түсті.

Шығыс ауылының ортасына тігілген ақшаңқан киіз үйлер Наурыздың сәнін келтіріп, мерекелік көңіл-күй сыйлады. Барлығы 13 киіз үй тігілген, олардың әрқайсысы ауыл көшелерінің атауына сай безендірілген: «Нұрбесік», «Шарапат», «Ер Жәнібек», «Мұстафа Шоқай», «Байөлке», «Сарыарқа», «Алаш» және басқалары. Ауыл тұрғындары бірігіп дайындаған мол дастарханнан қонақтар наурыз көже мен ұлттық тағамдардан дәм татты.

Ақ дастарханда уыз, ақ ірімшік, сары ірімшік, ежігей, құрт, жаубүйрек, жұмыр, ши бауырсақ, бал бауырсақ, қымыз, сүр ет, қазы сияқты дәстүрлі тағамдар самсап тұрды. Ата-баба дәстүрін сақтап келген қандастарымыздың ұлттық мәдениеті мен асханасы ауылдағы киіз үйлерде ерекше орын алды.

Ауылдың қыз-келіншектері саба пісіп, жүн сабап, оны түтіп, ұршыққа иіріп отырды. Киіз үйдің айналасындағы қолөнер шеберлері ұлттық бұйымдарды дайындап, келушілерге шеберлік сағаттарын өткізді.

Мерекелік шара барысында ауыл кәсіпкері Мұқият Шектай сөз алып, ауылдың бірлігі мен тыныштығын атап өтті:

Мерекеде әнші, сазгер Ахметжан Рәбжанның өнер көрсетуі мерекенің көрігін қыздыра түсті. Сондай-ақ, ақындар айтысы ұйымдастырылып, елдің рухын көтерген жырлар айтылды.

Мерекелік шараның тағы бір көркі – ұлттық спорт ойындары мен байқаулар болды. Жеңімпаздарға және ұйымдастырушыларға Өскемен қаласы әкімінің марапаттары табысталды.

Таң шапағы тарай сала басталған дүбірлі той кеш батқанға дейін жалғасып, ауыл тұрғындары мен қонақтарға рухани серпіліс сыйлады.

Фото/видео: Жәнібек Ырысбай