Семей – әлемдегі Рубик текшесінің шеберлері ең көп шоғырланған қала. Мұнда заңды түрде тіркелген 700 спидкубер тұрады, деп хабарлайды Алтайньюс тілшісі.

– Бір жарым жыл бұрын дүниежүзілік спидкубинг ассоциациясының тіркеуінде 16 отандасымыз ғана болған. Еліміз 107-орында еді. Қазір 30-орынға көтерілді, – дейді еліміздегі спидкубинг федерациясының басшысы Арман Машимов.

Басқатырғышты құрастырудың түрлі тәртібі бойынша рекорд бұзған отандастарымыздың 90%-ы дерлік Семейде тұрады. Сондықтан бұл қала еліміздегі спидкубингтің астанасы саналады.

– Мыңдаған спидкубердің басын қосып, қаланың қақ ортасында жарыс өткізсек тамаша болар еді. Рекордтар кітабына енеріміз хақ. Одан кейін бұл рекордты бұзу басқаларға оңай болмасы анық, – деп, Арман өзінің арманын айтып берді жуықта өткен баспасөз жиынында.

Оның ойынша, тоғызқұмалақ пен асық сынды ұлттық ойындарға да жақсылап көңіл бөліп, осындай биік деңгейге жеткізуге болады.