ШҚО әкімі тұрғындарды жеке мәселелері бойынша қабылдады
ШҚО әкімі Ермек Көшербаев облыс тұрғындарын жеке мәселелері бойынша қабылдап, мазалаған сұрақтарына жауап берді.
Аймақ басшысының қабылдауына әр аудан тұрғындары түрлі мәселемен жүгінді, деп хабарлайды Altaynews тілшісі.
Мәселен, Шемонаиха ауданындағы Зевакино арнайы әлеуметтік қызмет көрсету орталығында тұратын Гүлнар Нұрханова мен Владимир Жарких орталық қызметкерлері өз міндеттерін тиісінше орындамайтынын айтып шағымданды.
Ал, Владимир Жаркихтың айтуынша, соңғы уақытта орталықтың ас мәзірі де нашарлап кеткен көрінеді.
Өңір басшысы жұмыспен қамтуды үйлестіру және әлеуметтік бағдарламалар басқармасына жағдайды анықтауға тапсырма беріп,орталыққа жеке баруға уәде етті.
Алтай ауданының тұрғыны Сәуле Бақтиярова Жаңа Бұқтырма кентіндегі аурухана қашан жөнделетіні жайында сұрады. Оның айтуынша, жөндеу жұмыстары әлі күнге дейін басталмаған. “Тепловодоцентраль” КМК-да да дәл осындай жағдай.
Алтай ауданының әкімі Ернар Мұстафинның сөзіне сүйенсек, байқау өтіп, қаражат бөлінген. Бірақ анықталған мердігер қандай да бір қиындыққа тап болғандықтан жұмыстарды әлі бастамапты. “Тепловодоцентраль”КМК-да жобалық-сметалық құжаттама 2020 жылы әзірленген және қосымша қаражат тарту үшін оған түзету енгізу қажет.
Жағдайды егжей-тегжейлі түсіну үшін облыс әкімі бейінді басқармаларға осы мәселелер бойынша барлық қажетті ақпаратты дайындауды тапсырды.
Сондай-ақ Сәуле Бақтиярова Жаңа Бұқтырма кентінде өмірлік қиын жағдайға тап болған кәмелетке толмаған балаларды бейімдеу орталығына күрделі жөндеу жүргізу және Аналар үйін салу қажеттігін де атап өтті.
ШҚО ҚХА Қоғамдық келісім кеңесінің төрағасы Лео Шикті Достық үйлерінің және "Ұлттық тілдер мен мәдениеттерді жаңғырту" мектебінің қызметін жетілдіру қажеттігі толғандырған. Ол барлық этностардың өкілдері ана тілін ғана емес, мемлекеттік тілді де білуі керек деген ұстанымда.
Сонымен қатар өңір тұрғындарын Ахмерде дәрігерлік амбулатория салу, Зайсан ауданының Дайыр ауылында балаларға арналған сауықтыру-оңалту орталығы, Күршім ауданының Маралды ауылында туризмді дамыту, тағы басқа мәселелер толғандырды.
