Арнайы бағдарламаларды қолдану арқылы ҰБТ тапсырған талапкерлер мен ПББ тапсырған педагогтардың компьютерлеріне қашықтан қосылып, оларға тестен жоғары нәтижелер алуға жәрдем көрсеткен күдіктілер ұсталды, деп хабарлайды Altaynews Қазақпарат-қа сілтеме жасап.

Ұлттық қауіпсіздік комитетінің Қызылорда және Шығыс Қазақстан облыстары бойынша департаменттері прокуратура органдарымен өзара іс-қимыл жасай отырып өңірлерде Ұлттық бірыңғай тестілеуді (ҰБТ) және педагогтардың білімін бағалауды (ПББ) жүргізуге жауапты ұйымның жеке қызметкерлерінің тестілеу процесіне заңсыз араласу әрекетін тыйды.
Серверлік жабдыққа және басқа да ақпараттық ресурстарға қолжетімдікті пайдаланып, күдіктілер арнайы бағдарламаларды қолдану арқылы талапкерлер мен педагогтардың қызығушылық танытқан компьютерлеріне қашықтан қосылып, ақшалай сыйақы үшін оларға тестен жоғары нәтижелер алуға жәрдем көрсеткен.

2023 жылғы 19 шілдеде 3 негізгі күдікті ұсталды. Тінту барысында қашықтан қосылуды қамтамасыз ететін техникалық құрылғылар мен бағдарламалар, ақшалай қаражат және өзге де заттай дәлелдемелер тәркіленді.

Қазақстан Республикасы Қылмыстық кодексінің 207 («Ақпараттық жүйенің немесе телекоммуникациялар желісінің жұмысын бұзу») және 210-баптары («Зиян келтіретін компьютерлік бағдарламалар мен бағдарламалық өнімдерді жасау, пайдалану немесе тарату») бойынша сотқа дейінгі тергеп-тексеру басталды.

Қылмыстық-процестік кодекстің 201-бабына сәйкес өзге ақпарат тергеу мүддесінде жария етілмейді.

2022 жылы Ұлттық қауіпсіздік комитеті осыған ұқсас қылмыстар жасағаны үшін 6 адамды қылмыстық жауапкершілікке тартты.