Республикалық маңызы бар 5 мың шақырым жолды жөндеу жұмыстарын «Қазақстанның Даму Банкі» АҚ қаржыландырады.

Жол жөндеу жұмыстары 2024-2027 жылдар аралығында жүргізіледі, деп хабарлайды Altainews.kz тілшісі.

Инвестициялық жобаға 450 млрд теңге мөлшеріндегі ұзақ мерзімді несие қаражаты «ҚазАвтоЖол» ҰК» АҚ-ға келісім шеңберінде бөлінетін болады.

Сонымен қатар, су өткізгіш құбырлардың апатты көпірлері қайта жаңартылады. Сондай-ақ жолдардың қалпына келтірілген учаскелерінде көлік құралдарының салмағы мен көлеміне қатысты параметрлерін өлшеудің автоматтандырылған жүйесін іске қосу көзделген.

Жалпы, жобаны іске асыру автомобиль жолдарының техникалық сипаттамасын жақсарту арқылы өңірлердің көліктік-логистикалық әлеуетін ашуға елеулі үлес қосады. Көлік магистральдарының өткізу қабілеті мен жайлылығы артады. Жол бойындағы елді мекендердің одан әрі дамуына да серпін берілмек. Халықтың іскерлік белсенділігі артады. Көлік қызметтерін ақпараттандыру процесі жеделдетіледі. Көлік тасымалдарына қаржылық және уақытша шығындар қысқарады, бұл өз кезегінде елдің аграрлық және өнеркәсіптік секторларының дамуына оң әсер етеді.