«Мәдени сенбілік» бағдарламасының шеңберінде Семейдегі Невзоровтар отбасының өнер мұражайының қалпына келтіру шеберханасында суретші-реставратор О.О. Рубинчик мектеп оқушыларымен қызықты әңгіме сағатын өткізді, деп хабарлайды Аltaynews.kz тілшісі мұражайдың баспасөз ақпаратына сілтеме жасап.
Суретші-реставратор Семей шаһарындағы №43 орта мектептің 5 «б» сынып оқушыларымен «Картиналар да «ауырады»» - атты тақырыпта әңгіме-дүкен құрды.
Суретші балғындарға картиналарды қалай «емдейтіні» жайлы және біздің елімізде суретші-реставратор мамандардың жеткіліксіздігі туралы айтты. Балалар реставрация жасау және оған керекті құрал-жабдықтарға қызығушылық танытты.
Кейбір оқушылар келешекте осы мамандық жайлы ойланатындарын білдірді. Кетерінде балалар туындыларға тезірек "жазылып кетулерін» тіледі.