Шығыс Қазақстан облысының орталығында 21 жастағы жігіт I, II, III «а» дәрежелі күйікпен жедел жәрдем ауруханасына жеткізілді, деп хабарлайды Аltaynews.kz тілшісі.
Облыстық ТЖД-нің берген мәліметтері бойынша, Өскемен қаласындағы техникалық қызмет көрсету орталықтарының бірінде «Мерседес-Бенц» жеңіл автокөлігінің жанатын бөлшектері тұтанып, жанып кетті. Тілсіз жау гараж аумағының 4 шаршы метріне жайылған.
Соның салдарынан 21 жастағы жігіттің қолдары, мойны, беті күйіп, I, II, III «а» дәрежелі күйікпен жедел жәрдем ауруханасына жеткізілді. Зардап шегушінің денесінің 12 пайызы күйіп қалған.
Қазір өрттің шығу себептері ретінде электр құрылғысын пайдалану ережесін бұзған немесе жоғары қауіпті агрегатты қолдануда абайсыздық танытты деген болжамдар тексерілуде.