Өткен жылы елімізде «Жұмыспен қамту – 2020» мемлекеттік бағдарламасының пилоттық жобасы іске асырыла бастаған. Ресми деректерге жүгінсек, былтыр жобаның мүмкіндіктерін шамамен 600 шығысқазақстандық пайдаланса, енді бұл көрсеткіш екі есеге артпақ.
Бұл туралы «Жұмыспен қамту – 2020» мемлекеттік бағдарламасын жүзеге асыру жөніндегі аймақтық комиссияның алғашқы отырысында мәлім болды.
Бағдарламада көрсетілген бағыттарының бірі – ауылды жерлердегі халықты шағын несиемен қамтамасыз ету болса, осы мақсатта тек біздің өңірге ғана 6 млрд. теңгеден астам қаражат бөлінген. Сондай-ақ, басым бағыттарға мал, өсімдік, балық, құс шаруашылықтарын дамыту, киім-кешек, жиһаз, құрылыс материалдарын өндіру, туризм және тұрмыстық қызмет көрсету салалары жатады.
– Бұл соңғы сома емес. Шағын несиені пилоттық жобаларға емес, қалыпты жұмыс істейтіндерге береміз, – дейді облыстық жұмыспен қамту және әлеуметтік бағдарламаларды үйлестіру басқармасының бастығы Ольга Кузовлева.