Шығыс Қазақстан облыстық көпсалалы онкология және хирургия орталығы алғаш рет «ONKO WEEK VKO» халықаралық ғылыми-практикалық конференциясы өтетін алаң ретінде таңдалып алынды.  

3-5 шілде аралығында өтетін шараның шеңберінде шығысқазақстандық онкохирургтар Алматы, Астана, Тбилиси және Санкт-Петербург қалаларынан шақырылған әріптестерімен тәжірибе алмасып, бірқатар оқыту шеберлік сыныптарын өткізіп, баяндамалар жасайды, деп хабарлайды Altainews.kz тілшісі.
Шығыс Қазақстан облыстық денсаулық сақтау басқармасының  штаттан тыс бас онкологы Гүлмира Сағидуллинаның айтуынша, онкология және хирургия көпсалалы орталығының базасында «ONKO WEEK VKO» өткізу соңғы бес жыл ішінде орталықты жарақтандыру және жетекші шетелдік клиникаларда кадрларды оқыту жөніндегі бағдарламаның іске асырылуының арқасында мүмкін болды. Мұның бәрі ШҚО-да қатерлі ісіктерді диагностикалау мен емдеудің барлық түрлерін, соның ішінде жоғары технологиялық медициналық көмекті енгізуге мүмкіндік берді. Сондықтан онкологиялық орталық Қазақстанның түкпір-түкпірінен келген дәрігерлерді оқыту алаңына айналды. 

Қазақ онкология және радиология ғылыми-зерттеу институты онкологиялық қызметтің басшысы, медицина ғылымдарының кандидаты Ерлан Кукубасов өңірдің онкология қызметіне жоғары баға берді.
-    Біз Шығысқа оқыту үшін емес, тәжірибе алмасу мақсатында келдік. Өйткені сіздердің онкологиялық орталықтың заманауи құрал-жабдықтармен жабдықталу деңгейі өте жоғары, еліміздегі көшбасшы клиникалардың бірі. Қазір аз инвазивті хирургия жақсы дамып келеді, үш күнде біз ота жасаудың кейбір сәттерін талқылайтын боламыз. Оның үстіне ғылыми конференция болады, орталықтың жетекші мамандары мен шақырылған ғалымдар онкопластикалық хирургия, онкогинекология, онкоурология тақырыптарына қызықты баяндамалар жасайды, - деді Ерлан Кукубасов.
Облыстық көпсалалы онкология және хирургия орталығында алғашқы оталар бүгін жасалды. 
Ресейдің Санкт-Петербург қаласынан келген жоғары санатты онколог-дәрігер, торакальді хирург, аға ғылыми қызметкер Андрей Нефедов  қандай жаңа технологиямен бөлісетіні туралы айтып берді.

Астана қаласындағы  Қазақстан Республикасы Президентінiң Іс Басқармасы Медициналық орталығы ауруханасы урология бөлімшесінің меңгерушісі Бахтияр Қасымов онкоапталық аясында жоспарланған  реконструктивтік-пластикалық операциялар  туралы айтты. 

Айта кету керек, реконструктивті пластикалық хирургияны біздің онкологтар  2022 жылдан қолға алып келеді. 

Онкологиялық орталықтың мамандары мен шақырылған профессорлар несеп-жыныс жүйесінің, кеуде қуысының және әйел жыныс мүшелерінің қатерлі ісіктерін хирургиялық емдеу бойынша бірқатар практикалық шеберлік сағаттарын өткізеді. Үш күннің ішінде «ONKO WEEK VKO» аясында 11 операция жасау жоспарлануда. Ол үшін пациенттерді іріктеу жүргізілді, олардың барлығы - Шығыс Қазақстанның тұрғындары.
Үш күн ішінде хирургтар практикалық ғана емес, теориялық ақпаратпен де бөліседі. Ғылыми-практикалық конференция барысында 20 дәрігер қазақстандық тәжірибеге озық тәжірибені кеңінен енгізуге бағытталған онкохирургияның өзекті тақырыптары бойынша баяндамалар жасайды.