Қазақ елі мақтан тұтар талантты жастардан кенде емес. Тәуелсіздікпен тыныстаған отыз жылдан астам уақытта мұндай қабілетті буынның бірнешеуі өсіп шықты. Еліміздің болашағы да, республикамыздың мақтаныштары да осылар ғой.
Сондай білімді жастың бірі – С.Аманжолов атындағы ШҚУ-дың магистратурасын тәмамдаған Дәулетбек Ағзам. Ол заманауи автоматтандырылған қоқыс сұрыптау кешенінің жобасын әзірледі, деп хабарлайды Altaynews.kz тілшісі.

Жобада күн және жел энергиясын пайдалану көзделген, сондай-ақ QR-код қолданылады.  

Бір ұтымды тұсы, аталған контейнерлерге тұрмыстық қалдықтарды сұрыптап салған адамдарға сыйақы төлеу жағы да қарастырылған. Ол үшін арнайы QR-код енгізілген. Дәулетбек Ағзамның өзі атап өткендей, қайта өңделген қоқыс үшін ақшалай сыйақы  қазақстандықтардың экологиялық мәдениетін қалыптастыруға көмектеседі. 

Айта кетейік, автордың жобасы Түркиядағы EXPO халықаралық STEM-фестивалінде көпшілік назарына ұсынылған болатын. Онда оны сала сарапшылары жоғары бағалаған.