Бүгін Өскемендегі «Алтай» көтерме тарату орталығының алаңында Риддер қаласының  жәрмеңкесі өтті.

Дәстүрлі түрде өткізіліп жүрген жәрмеңкеде ауылшаруашылық өнімдері арзан бағада саудаланды, деп хабарлайды Altainews.kz тілшісі.

Облыс орталығындағы ірі инвестициялық жоба саналатын «Алтай» көтерме тарату орталығында жәрмеңке өнімдерін саудалау үшін 73 орын қарастырылған. Бүгінде Риддер қаласы 27 орында өз өнімдерін жұртшылыққа ұсынды. Оның ішінде 15-і – нақты ауылшаруашылығы өнімін сататын кәсіпкерлер.

Сауда саттықтан бөлек, мәдени спорттық шаралар да өтті. Тұрғындар үшін Риддер қаласының шығармашылық топтары өнер көрсетті. Салауатты өмір салтын ұстанушылар үшін қолкүрес, гір тасын көтеру, арқан тарту сынды спорттық ойындар ұйымдастырылды.

Аталмыш жәрмеңкелер апта сайын «Алтай» көтерме тарату орталығы аумағында ұйымдастырылып келеді.

Балауса Қожаева