Рамазан – рухани тазару, сабыр мен қайырымдылық айы, ол қоғамдағы бірлік пен ізгілік құндылықтарын нығайтады. Бұл айда мұқтаж жандарға көмек көрсетіліп, рухани құндылықтарды қолдау күшеюге тиіс. Қазіргі уақытта ШҚО мешіттерінде Рамазан айына дайындық жүріп жатыр, деп хабарлайды Altainews.kz тілшісі.

Қазақстан мұсылмандары діни басқармасы Түркия, Әзірбайжан, Өзбекстан және Қырғызстан елдерінің ғалымдарымен ақылдаса отырып, биылғы Рамазан айының басталу күнін белгіледі. Ортақ пәтуаға сәйкес, қасиетті Рамазан айы 1 наурызда басталады. Ал Қадір түні 26-27 наурызға қараған түні өтеді. 30 наурыз күні Ораза айт мерекесі тойланады.

ҚМДБ-ның fatua.kz ресми сайты мен арнайы Muftyat.kz сайтының Telegram-боты арқылы Рамазанға қатысты сұрақтарға жауап алуға болады. Сонымен қатар мешіттерде арнайы сұрақ-жауап бөлімдері жұмыс істейді.