ШҚО әкімі Нұрымбет Сақтағанов Марқакөл ауданына жасаған жұмыс сапары барысында бірқатар маңызды нысандарға барды, деп хабарлайды Altainews.kz тілшісі.

Аймақ басшысы аудан орталығында орналасқан №31 өрт сөндіру бөлімшесін жаңғырту жұмыстары аясында кезекшілікке түсетін құтқарушылар үшін қолайлы тұрмыстық жағдай жасау, сондай-ақ арнайы техникаларға арналған бокстарды кеңейту қажеттілігін қадап айтты.
Аудан әкімдігі, полиция, прокуратура және сот ғимараттарында күрделі жөндеу жұмыстары аяқталған.
Аудан әкімі спорттық-сауықтыру кешеніндегі құрылыс жұмыстарының сапасын қатаң бақылауда ұстауға тиіс. Бұл нысан ұзақ жылдар бойы аяқталмаған құрылыс ретінде тізімде тұрған еді. Енді оны уақытылы пайдалануға беру – тұрғындардың спортпен айналысуы мен бос уақытын тиімді өткізуі үшін аса маңызды.
Сапар барысында аудан әкімі Рүстембек Кемешевке және салалық басқарма басшыларына шекаралық аумақты дамыту бойынша нақты тапсырмалар берілді.

Марқакөл ауданының туристік әлеуетін дамыту – басым бағыттардың бірі. Бұл бағыттағы жұмыстар жүйелі және бірізді жүргізілуге тиіс. Аймақтың табиғи және экономикалық мүмкіндіктерін барынша тиімді пайдалану – негізгі мақсат.