Өскемен қаласының Жекпе-жек сарайында аты аңызға айналған жаттықтырушы Василий Поповтың 80 жылдық мерейтойына орай еркін күрестен TОP WRESTLING LEAGUE 8 турнирі ұйымдастырылды. Іс-шара Шығыс Қазақстан облысы әкімдігінің қолдауымен өтті.

TОP WRESTLING LEAGUE турнирі әдетте Астана мен Алматы қалаларында өтеді. Турнирді өткізуге бастамашы болған “Спорт және мәдениет дамыту басқармасы” қоғамдық бірлестігінің президенті Әлішер Ислам Өскеменде мұндай деңгейдегі сайыстың алғаш рет ұйымдастырылғанын атап өтті.

Жарысқа 6 команда қатысты: Семей, Өскемен, Алматы қалаларынан, Тарбағатай ауданынан, Қарағанды және Павлодар облыстарынан келген палуандар боз кілемде бақ сынасты. Спортшылар жеті салмақ дәрежесінде өнер көрсетті.

Командалық есепте Алматы қаласынан келген палуандар жеңіске жетіп, бірінші орынды иеленді. Екінші орынды Өскемен командасы алса, жүлделі үшінші орын Павлодар командасына бұйырды.

Турнирде жекелеген номинациялар да сарапқа салынды:

    •    Үздік лақтыру – Тарбағатайлық Оразхан Жалғасы;
    •    Үздік техника – Семей палуаны Мұрат Темірлан;
    •    Best Wrestler атағы – Алматы қаласының өкілі Сағымбай Мұхамедәли.

TОP WRESTLING LEAGUE 8 турнирі спорт сүйер қауымға үлкен әсер қалдырды. Жарыс көрермендерге еркін күрестің көркемдігін паш етіп, жас спортшыларға шабыт сыйлады.

Айдос Мырзахметов

Фото: Жібек Нұрахмет