Ұлы Жеңістің 78 жылдығын мерекелеу аясында ШҚО полиция департаментінің бастығы, полиция полковнигі Серік Жүнісбеков облыстық Ішкі істер органдары мен Ұлттық ұлан ардагерлері кеңесінің төрағасы Нұрлыбек Үдербаевпен бірге Ұлы Отан соғысының ардагерлері – Құрмат Рахимов пен Гавриил Одинцовты арнайы құттықтады.

Қос майдангерге ҚР ІІМ министрі атынан құттықтау жеделхаттарын табыс етті және «Құқық тәртібін қамтамасыз етуге қосқан үлесі үшін» медалімен марапаттады, деп хабарлайды Altaynews тілшісі.

Облыстың бас полицейі ардагерлерге сый-сияпаттарын тапсыра отырып, өз өмірлері мен денсаулығын бәйгеге тігіп, Отанды қорғаған ардагерлерге шын жүректен ризашылығын білдірді.

 Полиция департаментінің бастығы өз құттықтау сөзінде Жеңісті жаудан жұлып берген ардагерлердің ерлігі ешқашан да ұмытылмайтынын және олардың ерлікке толы өнегелі өмір жолы кейінгі жас ұрпаққа  әрқашан үлгі болатынын айтты.

Серік Жүнісбеков сонымен қатар қос ардагердің де соғыстан кейін ондаған жылдар бойы полиция қатарында қызмет етіп, қоғамдық тәртіп пен азаматтардың қауіпсіздігін қорғағанын мақтанышпен атап өтті.