Өскемендік полицейлер бір күннің ішінде бес алаяқтың жолын кесті. 
Өскемен қаласы Полиция басқармасының қызметкерлері халық арасында алаяқтыққа жол бермеу мақсатында, Өскемен қаласында орналасқан барлық банк филиалдарында әрбір келушілерге түсіндіру жұмыстарын жүргізіп жатыр, деп хабарлайды Altaynews тілшісі.
Түсіндіру жұмыстары күнделікті сағат 09.00-ден сағат 18.00-ге дейін жүргізіледі. 
Полиция қызметкерлері  банк келушілерін белгісіз тұлғаларға өздерінің дербес деректерін, өз карталары мен шоттарының деректерін, смс-хабарламалардың кодын хабарламауға, күдікті тұлғаларға сенбеуге, олардан келіп түскен кез-келген ақпараттың дұрыстығын тексеруге шақырды.
Түсіндіру жұмыстарының нәтижесінде полиция қызметкерлері бір күннің ішінде бес алаяқтық фактісін анықтады. 
35 жастағы қала тұрғынына алаяқ телефон шалып, айфон ұялы телефонын ұтып алғанын және басқа қаладан жеткізіп беру үшін 50 000 теңге төлеу керек екенін айтқан. 
Кейбір адамдарға алаяқтар  өздерін банк қызметкері ретінде таныстырып,  «Сіздің шотыңыздан әлдекім банктің мобильді қосымшасы арқылы өз шотына ақша аударымын жасамақшы, қаржыны сақтап қалу үшін ақшаны басқа картаға аудару қажет» деп хабарласқан. 

Полиция қызметкерлері қала тұрғындары мен қонақтарын  алаяқтардың арбауына түсіп қалмауға және сақ болуға шақырады.