Марқакөлдің қар басқан ауылдарына шөп жеткізілді
Жылдың басында Марқакөл ауданында қалың қар жауып, табиғи сыйпаттағы төтенше жағдай жарияланған болатын. Қар құрсауында қалған ауылдарда жылқы тебіндей алмай қалып, жем-шөптің қажеттілігі туындаған.
Осыған дейін көрші аудандар мен ауылдар көмекке жем-шөп бергендігін жазған болатынбыз. Алайда техниканың жетіспеушілігінен болып жеткізілмей жатқан еді. Кеше қар басқан ауылдарға шөп жеткізілді, деп хабарлайды Altaynews.kz тілшісі.
– Ел көмекке берген шөп кеше жеткізіліп, жұртқа таратылды. Ұранхай ауылына 5 орам шөп жеткізілді, енді 4 орам шөп сұрап отыр. Бұғымүйіз ауылына 7 орам шөп апардық, енді 3 орам шөп қажет екендігін айтты. Қалған шөп Төсқайың ауылына жеткізілді, – деді аудан белсендісі Қайыркен Қазыбекұлы.
Бұған дейін қар басқан ауылдардың жылқылары ойға түсірілгенін жазған болатынбыз. Жылқысын төменге түсірген жұртқа Боран және Қарашілік ауылдарының маңынан жайылым берілген.
Оқи отырыңыз
