Семейде төтенше жағдай жарияланды
Семей қаласы әкімдігі 29 наурыз күні жергілікті аумақта табиғи сипаттағы төтенше жағдай жариялады.
Айта кетейік, Ертіс бассейін инспекциясының нұсқаулығымен Шүлбі СЭС-нан шамадан артық су көлемі Ертіске жіберілген-ді. Осы жағдай Семейге үлкен қауіп төндіргені рас. Мәселен сегіз сағатта жеткен арынды су алдымен Түйемойнақ аралындағы жеке секторға жайылды. Жедел әрекеттің нәтижесінде бұл аумақтағы ахуал реттеліп, өзеннің ағысы қалпына келтірілді. Әйтсе де тілсіз жау қаланың Мирный, Затон аудандары мен Бобровка кенттеріне лап қойды.
Соңғы мәліметке сәйкес, Семей қаласында 140 үй мен үй маңындағы қоражайларға су жайылған. Бобровка кентінде 600-ге тақау саяжай, 150-дей тұрғын үй, сондай-ақ Затон ауданында 75 үй қызыл судың құрсауында қалған екен. Тұтастай алғанда 252 адам қауіпсіз жерге көшірілді. Десе де ресми органдар бұл санақтың өсуі мүмкін екенін жасырмады.